 |
| Gjatë intervistës së tij për Radion Evropa e Lirë më 1 shkurt 2024, gjenerali Gheorghita Vlad. |
Rumania ka nevojë për të miratuar një bazë ligjore me urgjencë që të lejojë pjesëmarrjen e vullnetarëve civilë në trajnimet ushtarake, pasi shteti duhet të përgatitet më mirë në rast se konflikti në Ukrainë përshkallëzohet, tha gjenerali Gheorghita Vlad, shefi i ri i ushtrisë së Rumanisë, në një intervistë për Radion Evropa e Lirë.
Gjenerali Vlad shprehu shqetësimin e tij për situatën aktuale dhe theksoi se nuk mendon se Federata Ruse do të ndalet në Ukrainë. Ai parashikon tensione në Ballkanin Perëndimor nëse Rusia fiton në Ukrainë, me synim kryesor ndaj Moldavisë. Vlad gjithashtu shprehu bindjen se presidenti rus, Vladimir Putin, do të përshkallëzojë politikat e tij në të ardhmen e afërt.
Konflikti në Ukrainë ka sjellë tensione në kufijtë veriorë të Rumanisë dhe në Detin e Zi që nga shkurti i vitit 2022. Për të përgatitur më mirë për këtë situatë, Rumania synon të miratojë një ligj që lejon shërbimin vullnetar ushtarak me afat të caktuar. Gjenerali Vlad theksoi se është e nevojshme të rekrutohen qytetarëtmes 18 dhe 35 vjeç, pavarësisht nga gjinia, kombësia apo feja, që të përfshihen në trajnimet e nevojshme për rregullat e luftës.
Në kontekstin e nevojës për një ushtri më të madhe, Vlad shprehu shqetësimin se numri i tanishëm i 80,000 ushtarëve profesionistë nuk është i mjaftueshëm për sfidat e momentit gjeopolitik. Ai propozoi se një numër adekuat për një ushtri profesionale rumune do të ishte rreth 120,000 ushtarë. Ligji aktual është në proces diskutimi në Parlamentin rumun dhe pritet të shqyrtohet pas zgjedhjeve lokale, parlamentare dhe presidenciale të këtij viti.